ESHAARA ZA YUDA TADEEHO OMUHIKIRIIRE:

Eshaara y'okwetondera Yuda Tadeeho omuhikirire 

Ai Yuda Tadeeho omuhikirire omunsi omu okaba Ori murumuna wa yezu ,ori munywani  we omucurezi. 

Akakutorana kuba entumwa ye y'akwegyesa byoona ebiyabaire nayenda ngu omanye, munomuno ebikwatiraine n'ekya muretsire kurokora abantu, mbwenu hurira okweshegyereza kwagye, Ninkusiima ahabwa okwehenegyera abantu, okehayo munonga kugoshora oruganda rw'abakristo, okahisya aha bahare amakuru marungi g'okubaretera okushemererwa. 

Ninkusiima ahabwa byoona ebi wakozire ebyakuranganise bikakuretera kwagwa abangiizi bakarugaho bakakwita ahabwa krisito, Reeba hati nitumanya gye ku okubonabonesibwa kwawe okwe kwakurugiremu okunanuka oku hati oine,okukundana kwawe na krisito kukahamibwa.

Abantu hati bakimanyiire kimwe ku iwe otari Yuda ori endebya, kureeka eiziina ryawe ry'ekitiinwa uwe kuniwe yaariretire ekishembere kibi. Mbwenu iwe omuhikirire omutonganirizi wa baine obujune irukangirira abakyene abaine enjaara y'eby'omutiima n'eby'omubiiri.

Hati nu ninkushaba nti n'obundabe ndy'omusiisi kwonka nimanya ku Ruhanga wenka ahabw'embabazi ze arikubaasa kunsasira nshabira okwikiriza kwagye oku ndi kumwikirizamu kweyogyere amaani ntarigira obu nyetombwitsire ahabwa endwara n'enaku zinteire.

Nshabira manye ebi Ruhanga ari kunyenza omu magara aga. Ninkushaba ontonganire ahari Ruhanga mbone kutunga ebindi kwetenga. Amiina 

 Eshaara y'okusiima Yuda Tadeeho omuhikirire 

Mukama wangye Yezu Kristo ninyenda kukusiima ahabw'embabazi nyingi ezi ongirire n'ebirungi by'ensi ebi ntungira noobirabya ahari munywani wangye Yuda Tadeho omuhikirire  kuntonganira.N'ahabw'ekyo niinyija kuguma ninkusiima.Naiwe Tadeeho gumizamu  nkunshabira, okweshegyereza kwangye kugume kungansire.Tindikwebwa,ndyaguma nkusiime, ahabw'okuba onyogize omuri obu buremeezi obubaire bumpingamire.Nimmanya ku orikubasa kugarurira okushemererwa ahabw' obushoboorozi  obu Ruhanga  yaakuhaire kasingye iwe omutonganirizi w'ebitabaasika.Amiina.

Eshaara y'okusaasira abatwanga. 

Ai Yuda Tadeeho Omuhiikirire, 

Iwe otarakaramire nibakwitira mukama waitu Yezu kristo, kureka okasasisira abazigu bawe nk'oku yaasasire abe. 

Mpa okwetegyereza oburungi oburi omukusaasira abatushagiza, ndekye kugirira enobi abataanyenda kureka mbakunde ,

Abatanyenda abo nabo obeetegyerezese ku twena turi eishe-emwe. Ruhanga kuniwe tatitwe obashabire bacwe eihari n'eitima bamanye ekihikire babe nikyo baguma nibakuratiira.

Ai Yuda Tadeeho Omuhiikirire Otushabire. Amiina. 

EShaara y'okushaba kutunga omurimo:

Ai Yuda Tadeho Omuhikirire omugumyagumya w'abari omu naku, reeba oku ndikutaaga mbuzire ekintungire omuri egi ensi  nungi ,ei Ruhanga yaatuhangire twena kutwereza eby'okurya.Mbwenu ebirungi byayo biri nk'ebirikumpingura ,tiinyine karungi ku birikungasira ahabw'okutagira muriimo.Ntonganira ahari Mukama waitu ansansire ntungye omuriimo oguranjune omu magara gangye n'ag'abunyine yaaba baana bangye nari beene tata.Haza omurimo ogwo gumpwere kuherezagye Ruhanga ninkora aha birungi ebi arampe nkabimugarurira.Nimpamya ku otarikwija kubura kukoora ekyo ahabwa'obushongere  bwawe bwingi obu oine omu maisho g'ekitebe ky'obugabe ekya Ruhanga. Amiina         

Eshaara ya oine obukyene: 

 Ai Yuda Tadeeho Omuhikirire Entumwa ya kristo, oruganda rw'abakristo rukuha ekitinwa. Rukushaba ahantu hoona nirukweta omutonganirizi w'abaine obukyene n'abaine obujune. Mbwenu naitwe otushabire tutugye ebi tukyenire. Mukama waawe niwe yakuhaire omugisha gw'okuhurira abarikukutagira okabaha juba Kandi butunu ebibarikukushaba.Otushabire tumanye ku turi abashobya omu mibiri yeitu tutyo tugume tutarikwetombitira Ruhanga.Otushabire twetegyereze oku kristo yaabonaboine tubone kumusasibwa. Nitwikiriza Kandi nitwesiga ku Ruhanga arikwija kutusaasira otutonganiireyo.

 Tubaganisize aha mashemererwa agu waagizire kristo azookire omu bafu.

Haza hati okushemererwa okwo kutuhikyeho watutungisa ebi bintu ebi turikwetenga.Iwe Yuda Tadeho nitumanya ngu Ruhanga ku arabe ayenzire,niwe okisiimire nitwija kuheebwa ekiturikukushaba eki...... krisito ahimbisibwe omuri Yuda Tadeeho Omuhikirire.Amiina.

Eshaara y'ori omunaku: 

Ai Yuda Tadeeho Omuhikirire,

 Entumwa eyaakunzire Yezu  ekahika n'aha kumufeera iwe omanywa omu nsi ku ori omugumyagumya  w'abanaku. Iwe orahuka kujuna abakutaagira, nkiza erihano......ritungamire.Tindikuguragurusya ku omu mwanya  gw'ezi naku orikwija kunteeraho okushemererwa, omu mwanya gw'o kurira onteereho okwesiima.

Ebyo nk'oku obikoreire baingi, naanye nikwesiga ku obinkoorera .Mukama Ruhanga akakuha obushoboorozi bw'okujuna abakuhungiraho niba kuhoogyera.

Mbwenu obushoboorozi bwawe obwo obworekyere omuriinye,Ruhanga abone kwongyerwa kuhimbisibwa omuriiwe.Ndebesa amaisho  g'embabazi aha bw'okuba omusharaba gu mpeekire gumpenzire.

 Manya nyine obusaasi omu biteekateeko n'omu mubiri .Amagara gangye ganywengyereirwe,omutima gwangye gwijwire enaku n'obujune .Ebiteekateeko bimpungire, naashusha nko'shwekirwe omwirima .Tihariiho orambaisabaise akangumya.

 Nishushwa nk'ori hare na Ruhanga n'ebye byoona.

Mbwenu iwe omunyasaasi otannagiirira omuri ezi naku kureka ondahukire ojune. Nyowe ndyaguma ninkusiima Kandi nimmanyisa abandi ebirungi bi okoreire ,Ruhanga abone kuhimbisibwa omuriiwe .Ai Yuda Tadeeho Omuhikirire otushabire.Amiina

Eshaara y'oine obujune.

Ai Yuda Tedeho Omuhikirire omuhereza murungi Kandi munywani wa Yezu, eiziina ry'endeebya rikeebesa Kandi ryakingira bingi oburungi bwawe. kwonka ekelezia maweitwe etuura neekuhoogyera neekuha ekitinwa ahantu hoona ku ori omutonganirizi w'abari omu naku n'abaine ebibagumiire munonga, ebyakubaasa kubahwisa amatsiko. Mbwenu naanye omunaku oshabire! Koresa obushoboorozi obwakuhairwe,

 ompwere juba omuri obu bujune bu ndimu Nyirukangirira juba omuri obu  bukyene n'omuri oku kubonabona kwangye, mbone kwesiima n'okushemererwa aha bw'ebirungi ebiruga aha w'omu iguru naabirabya omu ngaro zaawe,munomuno....... Haza mpimbise Ruhanga n'etoore ze  ez' omwiguru turi hamwe  naiwe.Kampigye nikuraganisa nti tindyebwa kirungi ki orankorere n'obukwakuba  okurereera kukuha ekitiinwa kikushemereire iwe munywani wagye buziima Kandi naayeheerayo kimwe n'amaani gangye goona kukora kyona eki ndaabaase kubuzya omu bantu oburungi bwawe  n'eiziina ryawe Ai Yuda Tadeeho Omuhikirire, Otushabire Kandi oshabire boona abakutagira! 

Yuda Tadeeho omuhikirire omuhwezi w'abateebaasa kwekiza, njuna omuri ezi naku zagye! 

Otushabire tubone kwikaikanisa Ruhanga Omuramuzi omwinganisa, atucwere orubanja atwiniire embabazi! Otushabire tushemerere kubarirwa omu rubu rw'abantu barungi n'obukwakuba omu nsi egi -obwo nitutwaza gye n'obucureezi nk'abaana ba Ruhanga.Amiina.

Eshaara y'okushabira omurwaire.

Ai Ruhanga otahwaho,hurira okweshengyereza kwangye,ohe omwiru waawe ogu..... amagara, arahukye kutegamuuka egi ndwara emwine kubi.Saasira ogu mwiru waawe otuura naakwikiriza kandi naakwesiga.omugisha gwa Ruhanga Taata na Mwana na Mutiima orikwera gugume nawe.Ai Yuda Tadeho Omuhikirire Omushabire.Amiina

Eshaara y'okushaba ebya ibara muringo.

Ai Yuda Tadeeho omukirire ,omu nsi maaweitwe oruganda rw'abakristo rukuha ekitiinwa, nirutumanyisa itwe abaana baarwo ku Ori omutonganirizi w'baba beeshobeire. Mbwenu nitukweshengyereza otushabire tutungye ebi turikwetenga ebi.... ekyo ninkishaba Mukama waitu omu iziina ryawe;ahabwa okuba akatugira ati mushabe muheebwe.

Niinyikiriz ngu ahabw'obushoboorozi bu yaakuhaire ku atarikubura kuhurira eki oraamushabe.Ahatari kuguragurusya niinyikiriza  ku eki ndikushaba eki kiri eky'okunjuna kuheereza gye Ruhanga n'okushemeza amagara  g'omutima gwagye  n'eyabagyenzi bagye.Amiina

Eshaara y'okukira omuze gw'okwetiiha ebirikusinza.

Ai Yuda Tadeho Omuhikirire ,Ruhanga namanya ku ndikushobya omu kunywa kwangye.Manya ku nywa ndezya ,nshishagura ntyo empiiha ezaakunjunire kukora ebirikukizaho omugasho,n'okuheereza gye Ruhanga .Obundi n'obundi nsinda ngyenda nintaruza ntakyetegyereza gye,haza ekyo kinduguramu kukora ebindi bibi .Nikushaba n'obucureezi ontungise okwegarukamu,ngire amaani n'engyesho nungi ebi naabire nyine ira .Nkorera eky'okutanganza ndekye kuba eky'okuteeza entsibo omu maisho ga Ruhanga n'omu ka yangye.Amiina

Eshaara y'okushaba kutunga ebirungi by'omutiima.

Ai Yuda Tadeho Omuhikirire ,Ruhanga akampanga ngu mushushane omu kugira emicwe mirungi eiziina rye ribone kuhimbisibwa omuri nye.Mbwenu onshabire ntungye engyesho nungi...Amiina

Eshaara y'okukiira endwara.

Ai Yuda Tadeeho Omuhiikirire  ninkuhoogyera n'okukunanata,ompisyeho amaani gaawe nkire egi ndwara...,enkweitse.Omubiri gwangye gujogajogokire tikibaasa ahabwa obusaasi kugira ebiteekateko birungi ahari Ruhanga.Ntungira amagara g'omubiri ,mbone kuheereza gye Ruhanga nshemereirwe ,ahabw'okuba obujune bu nyine nibwo burikunzibira kumuteekateekaho gye .Reebesa amaisho g'embabazi amagara gangye ndahukye kukira Kandi ku ndaakire ogandindire ,onyorekye n'ebishemerire kukora mbone kuheereza gye Ruhanga.Embabazi zawe aharii-nye,nzimbeere omubazi gunnogaine.Ai Yuda Tadeho Omuhikirire,hurira n'a-barikushabira n'abanyiniire esaasi.Amiina

Eshaara y'okuhamira omubushwere oburikwera

Ai Tadeeho omuhikirire nkunzi y'obushwere burikwera ,Iwe owaarabire omu buremeezi bw'okurinda eka okiri omu nsi egi,Iwe otarabuzire kuhikwaho emirabanamu y'obushwere,onshabire mbone kwentantara emitego ya sitani n'ey'ensi,mpamiire omu magara gangye amasya agundimu,agu Ruhanga wenka yampaire.Nshabira obu bushwere bwagye burekye kumeenameenesa kureka okumbukaza;byona ah'abw'obushooborozi bwa Ruhanga bigyende gye.Nyesya mbase kubagana aha mashemererwa g'eizooba ritwayeteeranireho nituhimbisa Ruhanga nyowe na mugyenzi wangye ou yampire .

  Ai Yuda Tadeho Omuhikirire,shabira mugyenzi wagye arereerere aho oku ...Ai Yuda Tadeho Omuhikirire nshabira ndererere aho oku....kundiba nyine ekinashagiza mugyenzi wangye ansaasire;nawe ku arigira eki yanshobeza mmusaasire,otutungire amaani g'okugumisirizana n'ag'okukundana. Amiina

Eshaara y'okushaba okutunga obushwere oburikwera;

Ai Yuda Tadeeho omuhikirire kunzi y'obushwere oburikwera,naija ahi ori nikwesiga .Ninyenda onshabire ndekye kuteteerwa nari kubushukana omu kwetooranira ow'okumbisa,kureka obe niiwe waanyebembera kumunyoreka hatari kuguragurusya.Nomanya obushwere ku bugumire ,ku buri obw'obutwire kandi noomanya ku buri eisakaramentu.

Mbwenu nu  nshabira omugisha mpweze,ndekye kushobya omu kwetooranira ou ndagume nawe obutoosha omu nsi ari owagye onkwire,orikimanya Ruhanga,ow'obwengye,ow'emicwe mirungi ,ow'embabazi,orikugumisiriza,orikukunda,oteebekaine,oine emicwe y'obantu ,Kandi orikutwaza mpora,otarisigaho ndi omu naku naru omundwara.

Ai Yuda Tadeeho Omuhikirire nshabira naanye nshemeze engyesho zangye ahabwa Ruhanga n'ahabw'omurigirwa wagye ogwo ou orankwatse.Amiina

Eshaara y'okushaba ebintu by'ensi ebi orikwetenga;

Ai Yuda Tadeeho Omuhikirire ninyetenga kutunga.....Ninyetenga ti ahabwa'okwenda kwetuguzibwa okukitunga,kureka ahabw'okumbasisa kuhereza gye Ruhanga .Ruhanga ogwo ow'embabazi,owahangire ebintu byoona omuntu kibyejunisa ompe okutunga ebyo birungi ebyagabira abaana bee,onshabire Kandi nyetegyereze amakuru n'omugasho gw'ebyo butungi omunsi birekye kunyekweisa ahari Ruhanga kureka nyeyongyere kumugaragira gye okukiraho n'okuguma nimusiima ahabw'embabazi ezi angirire ninyenda Kandi otaisemu omutiima murungi gw'okukunda kujuna abooro abataine mugisha gw'okutunga ebirungi by'ensi nkanye okunagutunga  .Ai Yuda Tadeeho Omuhiikirire onshabire Amiina.

Eshaara y'okushabira abasiisi

Ai Yezu enkunzi y'emitiima yoona,otaikiriza kuferwa omutiima gwa.....ogujuumikirwe engyesho mbi egi...ei atuuramu .Niwe waahangire abantu ngu bakuhereze omu nsi Kandi bakuhimbise omu iguru.Mbwenu ikiriza...acwe ogu muze,ayegarurire engyesho ezi yakuraganiise kukuratira obu abatizibwa.

Otaikiriza eshagama yawe eyaasheeshekire kusheeshekyera busha,kureka ahabw'okutonganirirwa murumuna waawe Yuda Tadeeho Omuhikiirire ,otusaasire otuhe okubagana aha mashemererwa agu oraayakiiriremu N....ogu ,yagaruka ah'ori.Ai Yuda Tadeho Omuhikirire otushabire.

AMAHAISO GA YUDA TADEEHO OMUHIKIRIIRE. 

 Yuda Tadeeho omuhikirire omunyabuzaare na Yezu na Biikira Maria ,

otushabire

Owaakunzire munonga kureeba Yezu na Maria n'okuguma nabo omu nsi,

Otushabire

Owahairwe ekitiinwa ky'okuba entumwa,

Otushabire 

Owaareebire Yezu omucureezi naakunaabisa  ebigyeere,

Otushabire 

Owagaburiirwe Enjeru ya Ukaristiya Yezu naagikweheera,

Otushabire 

Owaatuntwire ahabw'okufa Kwa Mukama waawe; bwanyima okashemererwa wamureeba azookire, okamuroreera nateemba omu iguru,

Otushabire 

Owaijuziibwe Mutiima Orikwera aha kiro Kya  pentekooti,

Otushabire 

Owaarangiriire Amakuru Marungi omuri Perisiya,

Otushabire 

Owaahindwire baingi okabaikirizisa eby'amaziima,

Otushabire 

Owaakozire eby'okutangaaza bingi ahabw'obushoboorozi bu wahairwe Mutiima Orikwera,

Otushabire 

Owaagarurire amagara g'omutiima nag'omubiri Omugabe Abagaro owaabaire naraamya emandwa,

Otushabire 

Owaateire aha mutwe amasitaani, okagabuza n'ebi garaakore,

Otushabire 

Owaarangire ku Omwinginya n'omuzigu we w'amaani barikwija kwikirizana, bakagirirana obusingye,

Otushabire 

Yuda Tadeeho owazibiire enjoka kutatema muntu zikamwitsa obushegu,

Otushabire 

Iwe otareeteire ha by'okutiinatiinisibwa abangizi,okeegyesa Amakuru Marungi ga Krisito,

Otushabire 

Owarebasiibwe enaku,okaba omujuni  nibakutura okukunda Mukama waawe,

Otushabire 

Ai iwe Entumwa omuhiirwa nitukuhoogyera nitukwesiga×3

Yuda Tadeeho Omuhikiriire mubangizi w'abeehweire amastiko,ompwere omuri ezi naku zagye×3

Ahabw' Obutonganirizi bwawe,abaasaserdooti n'abaikiriza boona beecurengyere ediini enkristo.Abakaafiiri nabataikiriza bahumuukye, baikirize eby'amazima.

Naitwe tweyongyere kuhamya engyesho nungi ey'okwikiriza,n'eyokwesiga,n'eyokukunda.Tutungye amaani g'okutaikiriza biteekateeko bya sitaani n'okugwa omu mitego ye.

Ahabw'embabazi zaawe juna Kandi orinde abakukunda, bakeecurenga kukuhaisa ekitiinwa.

Ahabw'embabazi zaawe oturinde okugwa omu kibi,n'okworobera amairu g'omubiri.

Ahabw'embabazi zaawe otukingire sitaani,etatukiza emikono omuri byoona,munumuno eby'okutubeihabeihesa omu kacu k'okufa kwaitu.

Otushabire twangye ebibi byaitu,tutugye amaani g'okweteisiza kimwe n'omugisha gw'okutunga amasaakaramentu tutakafiire.

Otushabire Ruhanga atugirire esaasi omukutucwera orubanja,atuhe ekifubiro kiringaniire.

Otushabire tubarirwe omu kimburo ky'abarihiirwa,baakeesiina nibareeba Ruhanga  waitu ebiro byona.

Kataama ka Ruhanga 

Iwe oihaho ebibi by'ensi,

Otusaasire ai Mukama .

Kataama ka Ruhanga,

Iwe oihaho ebibi by'ensi,

Otusaasire.

Yuda Tadeeho Omuhikirire ,otushabire,

Tubone kushemerera ebi kristo yaaturaganiise.

       TUSHABE

Ai Ruhanga owaayohereize Entumwa yaawe Yuda Tadeeho kutumanyisa eiziina ryawe,twakweshengyereza otuhe okuhimbisa ekitiinwa kye nitukora ebirungi. 

Ekyo  twakikushaba omuri kristo Mukama waitu.Amiina.

For your article to be published contact 

WATSUP. +256785397006

E-mail tumusiimebrian44@gmail.com